Ermənistanda azərbaycanlı hərbçi saxlanılıb: Nəsimi Musayev mülki şəxsi yaralamaqda ittiham olunur
Ermənistanın Sünik vilayətində azərbaycanlı hərbçi saxlanılıb. Ermənistan tərəfi onun Şəki kəndində bir mülki şəxsi odlu silahla yaraladığını bildirib. Azərbaycan Baş Prokurorluğu isə Laçın istiqamətində itkin düşdüyü açıqlanan hərbi qulluqçu Nəsimi Musayevin Ermənistan ərazisində saxlanıldığını təsdiqləyib.
Ermənistan Milli Təhlükəsizlik Xidməti (MTX) Sünik vilayətinin Şəki kəndində bir nəfəri yaralayan azərbaycanlı hərbçinin saxlanıldığını bildirib.
MTX-nin məlumatına görə, sentyabrın 29-da Azərbaycanın Dövlət Təhlükəsizliyi Xidməti Ermənistan tərəfinə hərbi qulluqçulardan birinin naməlum şəraitdə xidmət yerini tərk etməsi barədə məlumat verib. Hərbçinin Ermənistan dövlət sərhədini qanunsuz keçə biləcəyi istisna edilməyib.
Bundan sonra hər iki ölkənin aidiyyəti qurumları tərəfindən axtarış tədbirləri həyata keçirilib.
Oktyabrın 1-də saat 14:15-də Ermənistan Daxili İşlər Nazirliyinin 112 Operativ İdarəetmə Mərkəzinə Sünik vilayətinin Şəki kəndində bir nəfərin ayağından güllə yarası alması barədə məlumat daxil olub.
Ermənistan MTX həmin şəxsin azərbaycanlı hərbçi tərəfindən yaralandığını bildirib. Hərbçi daha sonra saxlanılıb və hadisə ilə bağlı Ermənistanda cinayət işi başlanıb.
Ermənistan tərəfi hadisənin detallarını açıqlayıb
Ermənistan Baş Prokurorluğu hadisə ilə bağlı əlavə məlumat yayıb.
Prokurorluğun məlumatına görə, hadisə oktyabrın 1-də saat 14:00 radələrində Sünik vilayətinin Sisian icmasına daxil olan Şəki kəndində baş verib.
Ermənistan tərəfi Azərbaycan vətəndaşı, hərbi qulluqçu Nəsimi Musayevin kənddəki evlərdən birinə qanunsuz daxil olduğunu bildirib. Məlumata görə, evdə aşkar edildikdən sonra Musayev odlu silahdan atəş açıb və nəticədə 1987-ci il təvəllüdlü A.A. adlı qadın ayağından yaralanıb.
Prokurorluq Musayevin daha sonra hadisə yerindən uzaqlaşdığını və axtarış tədbirləri nəticəsində yaxınlıqdakı başqa bir evin ətrafında saxlanıldığını qeyd edib.
Ermənistan tərəfi hadisə ilə bağlı cinayət işi başladığını və araşdırmanın davam etdiyini bildirib.
Azərbaycan tərəfi Nəsimi Musayevin saxlanıldığını təsdiqləyib
Azərbaycan Baş Prokurorluğu da hərbi qulluqçu Nəsimi Musayevlə bağlı məlumat yayıb.
Rəsmi məlumata görə, Musayev Nəsimi Rasim oğlu sentyabrın 26-da Laçın rayonu istiqamətində yerləşən hərbi hissələrdən birində xidmət zamanı itkin düşüb.
Onun axtarışı ilə bağlı Müdafiə Nazirliyi və digər aidiyyəti qurumlar tərəfindən tədbirlər həyata keçirilib.
Azərbaycan Baş Prokurorluğu hərbi qulluqçunun xidmət yerini özbaşına tərk etməsi ilə bağlı cinayət işi başlanıldığını və aparılan araşdırma zamanı onun Ermənistan ərazisində saxlanıldığı barədə məlumatın əldə edildiyini bildirib.
Beləliklə, Ermənistanın saxladığı azərbaycanlı hərbçinin Nəsimi Musayev olduğu Azərbaycan tərəfinin açıqlaması ilə də təsdiqlənib.
Musayevə qarşı yeni ittihamlar irəli sürülüb.
Ermənistan tərəfinin son məlumatına görə, Nəsimi Musayevə qarşı qanunsuz olaraq Ermənistan dövlət sərhədini keçmə və odlu silahla bağlı əlavə ittihamlar da irəli sürülüb.
Ermənistanın hüquq-mühafizə orqanları hadisənin bütün hallarının araşdırıldığını bildirib.
Hazırda hadisənin hansı şəraitdə baş verdiyi, Nəsimi Musayevin Ermənistan ərazisinə necə keçdiyi və Şəki kəndində baş verən insidentin bütün detalları ilə bağlı araşdırma davam edir.
İş üzrə Ermənistan tərəfinin yaydığı məlumatlar istintaq orqanlarının versiyasıdır. Nəsimi Musayevin hüquqi statusu və hadisə ilə bağlı məsuliyyəti yekun məhkəmə qərarı ilə müəyyənləşəcək.
Voicepress
