ABŞ Ukrayna hərbçilərinin hərbi hazırlığının təkmilləşdirilməsi istiqamətində təlim proqramlarını davam etdirir. Hazırlıq prosesi müxtəlif silah sistemlərinin istismarı, hərbi texnikaya texniki xidmət, aviasiya və müasir döyüş şəraitində fəaliyyət bacarıqlarını əhatə edir.
VOİCEPRESS-in “Stars and Stripes”ə istinadən məlumatına görə, ABŞ ordusu Almaniyanın Bavariya bölgəsində Ukrayna hərbçilərinin hazırlanması missiyasının idarə edilməsini Milli Qvardiyadan daimi dislokasiya olunmuş ABŞ ordusunun aktiv bölmələrinə ötürüb.
Məlumata əsasən, 2015-ci ildən fəaliyyət göstərən Birgə Çoxmillətli Ukrayna Təlim Qrupu indiyədək Almaniyada 24 mindən çox ukraynalı hərbçinin hazırlığında iştirak edib. 2022-ci ildə Rusiyanın Ukraynaya qarşı genişmiqyaslı müharibəyə başlamasından sonra təlimlər Ukrayna ərazisindən Almaniyaya köçürülüb.
Bundan əlavə, ABŞ Ukrayna hərbçilərinə F-16 qırıcılarının idarə edilməsi və texniki xidməti, Bradley və Stryker zirehli döyüş maşınlarının, HIMARS reaktiv yaylım atəşi sistemlərinin istismarı üzrə də təlimlər keçirib.
2026-cı ilin aprel-iyun aylarını əhatə edən hesabat dövründə 575 ukraynalı hərbçi ABŞ mütəxəssislərinin iştirakı ilə müxtəlif təlim proqramlarından keçib. Təlimlər Almaniya, İspaniya, Polşa, Rumıniya, ABŞ və Ukraynada təşkil olunub.
ABŞ-ın Ukrayna hərbçilərinin hazırlığına dəstəyi davam edir. Təlimlərin əsas istiqamətlərindən biri Ukrayna Silahlı Qüvvələrinin müasir hərbi texnikadan istifadə və onun texniki təminatı sahəsində imkanlarının artırılmasıdır.
VOİCEPRESS
