“Belə bir statistika əslində hər birimizin boynuna ikiqat məsuliyyət qoyur”. Bunu VOİCEPRESS-ə açıqlamasında Dünya Azərbaycanlılarının Mədəniyyət Mərkəzinin vitse-prezidenti, sosial-siyasi ekspert, “Ümidlə gəl” tele verlişinin layihə rəhbəri Hacı Quliyev deyib. Onun sözlərinə görə, Azərbaycanda 1200 məktəbli qızın abort etdirməsi cəmiyyətin ən ağır, utandırıcı və sarsıdıcı xəbəridir: “Bu məsələdə hər bir vətəndaş məsuliyyət daşıyır. Ailədə uşaqların körpə yaşlarından nəzarətsiz böyüməsi yəni, günün çox saatını televizor və internet qarşısında keçirməsi, belə bir nəticələrə səbəb olur. Əfsuslar olsun ki, bu gün hər bir valideyn ailənin sosial problemlərinin həllini yalnız ailənin maddi vəsaitlərinin qarşılanmasında görürlər. Amma bu gün ən böyük sosial problem uşaqların ailədə nəzarət altında hərtərəfli inkişafının təmin olunmasıdır.

Erkən yaşlarından uşaqları elmə, kitaba, rəsmə, rəqsə alışdırmaq, onların asudə zamanlarının səmərəli keçirilməsi birmənalı olaraq belə məyusedici halların qarşısını ala bilər. Bəzi bölgələrimizdə əfsuslar olsun ki, qız uşaqlarını 15-18 yaşlarında ailə qurmaq məcburiyyətində qalırlar. Həmən bölgələrdə insanların maarifləndirilməsi işləri aparılmalıdır.

Siz təsəvvür edin ki, bu qızların yaşadıqları onlarda necə ciddi psixoloji sarsıntılara səbəb olur. Eyni zamanda hətta bir daha ana olmamaq qorxusu onları hər zaman təqib edir. Özləri hələ uşaqikən bu qədər ağır yüklə üzləşmiş olur, eyni zamanda cəmiyyətin qınağına səbəb olurlar.
Bu gün bu statistik məlumatlar bizlər üçün bir həyəcan təbilidir. Buna görə də, məktəblərdə psixoloqlar problemli ailələrlə yaxından tanış olmalı, onları maarifləndirməlidir. Bu yöndə maarifləndirmə proqramının ilk olaraq, televiziya və radio vasitəsi ilə daha geniş formatda aparılmasına start verilməlidir, deyə düşünrəm”.