XİN-dən VOİCEPRESS-ə verilən məlumata görə, çıxışında Elmar Məmmədyarov Azərbaycanın GUAM-ın fəal üzv dövləti olaraq təşkilatın inkişafına və üzv dövlətlər arasında əməkdaşlığın dərinləşdirilməsinə əsaslı töhfə verdiyini qeyd edərək təşkilat çərçivəsində uğurlu fəaliyyətin qarşılıqlı inam və dəstək üzərində qurulduğunu deyib.
Elmar Məmmədyarov 20 il öncə GUAM-ın regionda sülh, təhlükəsizlik və sabitliyin möhkəmləndirilməsi və üzv dövlətlər arasında iqtisadi inkişaf və əlaqələndirmənin təşviq edilməsi məqsədilə yaradıldığını deyərək GUAM-ın üzv dövlətlər və onların tərəfdaşları arasında çoxtərəfli əməkdaşlığın gücləndirilməsi üçün xüsusi regional platformanı təmin etdiyini diqqətə çatdırıb.
GUAM üzv dövlətləri ərazisində olan həlli uzadılmış münaqişələrə toxunan nazir Elmar Məmmədyarov bu münaqişələrin suverenlik, ərazi bütövlüyü və dövlətlərin beynəlxalq səviyyədə tanınmış sərhədlərinin toxunulmazlığı prinsipləri əsasında həll edilməli olduğunu vurğulayıb.
GUAM daxilində strateji səviyyədə münasibətlərin iqtisadi əlaqələrin genişləndirilməsi və ticarət və nəqliyyat sahələrində əməkdaşlığın inkişafı üçün əlverişli mühiti təşviq etdiyini deyən Elmar Məmmədyarov Bakı-Tiflis-Qars dəmir-yol xəttinin GUAM regionu daxilində və onun ətrafında yerləşən ölkələr üçün tranzit körpüsü rolunu oynayacağını qeyd edib. Bu xüsusda, Avropa və Asiyanı birləşdirən GUAM Nəqliyyat Dəhlizinin təşviqinin vacibliyinə diqqətə çəkib.
Elmar Məmmədyarov Azərbaycanın GUAM daxilində müxtəlif sahələr üzrə əməkdaşlıqdan məmnun olduğunu qeyd edib və üzv ölkələr arasında iqtisadi-ticarət əlaqələrinin inkişaf etdirilməsi üçün birgə səylərin daha da artırılmasının vacibliyini vurğulayıb.
Nazir bildirib ki, son 20 ildə GUAM üzv ölkələri tərəfdaşlıq və qarşılıqlı hörmətə əsaslanan yaxın əməkdaşlıq əlaqələri qurmağa nail olublar və üzv ölkələr arasında inamın və həmrəyliyin artması təşkilatın işini daha da müvəffəqiyyətli edəcək.
VOİCEPRESS.AZ
