VOİCEPRESS France Nation-a istinadən bildirir ki, Küveytin ən məşhur din xadimlərindən və illahiyyatçılarından biri, “elmli şeyx” adlandırılan Nəsser Dəşti belə deyib.

O, Küveytdəki “Əl Şahed TV” telekanalındakı “Cəmiyyət və insan” proqramında belə deyib. Proqrama N.Dəşti ilə yanaşı, din xadimi Ayəd əl Mənna, habelə mühafizəkar şeyxlər Abdallah əl Həmdan və Xaled əl Sultan da dəvət almışdılar.

Proqramdakı müzakirələr zamanı Nəsser Dəşti söyləyib: “Müsəlman ölkələrində terror təşkilatlarının, radikal və ekstremist qruplaşmaların sayı artır. Təbii, mən də bilirəm ki, bu mənhus təşkilatların islamla heç bir əlaqəsi yoxdur, onlar sadəcə islamla pərdələnirlər. Bəla odur ki, terrorçular sıralarına gəncləri cəlb edir, tam formalaşmamış və bitkin olmayan dünyagörüşə malik bu insanlardan faydalanırlar. Hətta özlərini dünyəvi, Qərb dəyərlərinə meylli adlandıran insanlar arasında sonradan terror təşkilatlarına qatılan, cəllad və qatilə dönən, hətta “canlı bomba” kimi özlərini partladanlar var. İslam alimləri, nüfuzlu din xadimləri, məşhur illahiyyatçılar terrorçulara lənət oxusalar da, əfsuslar olsun ki, bir çox din xadimlərinin açıqlamaları və mövqeləri ilə İŞİD, “Əl Qaidə” ideologiyası arasında heç bir fərq yoxdur”.

N.Dəştinin fikrincə, hazırda ifrat dindarlıq cəmiyyətin ballastına, ağır yükünə çevrilib.

“İnkişaf etmək, habelə terrorla effektiv mübarizə aparmaq üçün cəmiyyətdə dinin mövqelərinə yenidən baxmaq gərəkdir. İslama həddindən artıq yer vermişik. İslamı ictimai və siyasi həyatdan kənarlaşdırmalı, insanları şəxsi həyatı ilə məhdudlaşdırmalıyıq”, – N.Dəşti söyləyib.

Bu açıqlama Fars Körfəzi ölkələri ilə yanaşı, bir sıra müsəlman dövlətlərində də birmənalı qarşılanmayıb.

VOİCEPRESS.AZ