“28 Mall” Ticarət Mərkəzi bu gün səhər saatlarından bağlanıb. Ticarət mərkəzinin qarşısına alış-verişə gəlmiş xeyli adam toplaşsa da, onların içəri girişinə icazə verilmir. VOİCEPRESS-in məlumatına görə, bağlanmaya səbəb səhər saat 10:00-dan ticarət mərkəzinə elektrik enerjisinin verilişinin dayandırılmasıdır.
“Azərişıq” ASC-nin mətbuat xidmətinin rəhbəri Tanrıverdi Mustafayev VOİCEPRESS-ə açıqlamasında mərkəzin bağlı olduğunu təsdiqləyib. Onun sözlərinə görə, alış-veriş mərkəzinin daxilində elektriklə bağlı problem yaranıb. “Bu onların daxili işidir. Naqillərdə zədələnmə var. Bizim əməkdaşlarımız problemi aradan qaldırmaq üçün ticarət mərkəzinə gedir”.
Binanın meneceri İstiPress-in əməkdaşına bildirib ki, işığın olmamasına Nəsimi rayonunda yerləşən yarımstansiyada naqillərin əriməsi səbəb olub. Saat 17-ə qədər vəziyyətin düzəlməsi gözlənilir. Elektrik enerjisi bərpa olunmazsa, bu gün iş olmayacaq və işçilər evə buraxılacaq.
Elektrik enerjisinin hansı səbəbdən dayandırıldığı və ticarət mərkəzinə bağlı qaldığı müddətdə dəyən ziyanlar haqqında əlavə məlumat veriləcək.
VOİCEPRESS.AZ
