Bu siyasilərin şəxsi türmələrində nə qədər “dustaq” var?

Siyasət

495

Bu siyasilərin şəxsi türmələrində nə qədər “dustaq” var?
Seçki ilində amnistiya və əfv qərarı xüsusi əhəmiyyətə malik olduğundan bütün nəzərlər hakimiyyətə dikilir. Əlbəttə, bağışlamaq İlahi xüsusiyyətdir və dövlətin birinci şəxsinin humanizminə bəslənən ümidlər də köklü hüquqi-mənəvi əsaslara malikdir. Yəni insanlara etdikləri cinayətlərə görə azadlığa dönüş şansını verməklə də onları islah yoluna çıxara bilərsən.

Bu sözləri VOİCEPRESS.AZ-a açıqlamasında millət vəkili Zahid Oruc deyib. Millət vəkili bütün dünyada olduğu kimi, azərbaycanlıların da həyatının ayrılmaz hissəsinə çevrilən sosial şəbəkələrdə hər gün yaşanan virtual killerlik və ya qiyabi qətllərin də eyni zamanda, narahatedici olduğunu vurğulayıb:

“Feysbukun simvolu olan şəbəkələşmə və sərhədsiz əlaqələr nə qədər gerçəkdirsə, bir o qədər də “qara siyahılar”a düşən adamların sayı sürətlə artmaqdadır. Yəqin, siz hər gün aparılan diskussiyalar zamanı çox kiçik mübahisələrdən sonra kimlərinsə növbəti rəqibini və barışmaz tənqidçisini necə böyük rəşadətlə bloka atdığı barəsindəki qələbə raportu ilə tez-tez rastlaşırsız. Gördüyünüz kimi, Markın divarı təkcə dostlara deyil, eləcə də çox asanlıqla düşmənə çevirə bilir. Sabah heç kim tərəddüd etmədən qonşusunu da virtual aləmdə deyil, reallıqda “qara siyahı”ya daxil edəcək. Halbuki ucqar sovet kəndində iki adam küsülü olanda onu hamı bilirdi və hər kəs çalışırdı ki, ortada barışıq olsun. Deməli, sosial şəbəkələr istənilən cəmiyyətdə mənəvi-sosial durumu və ictimai psixologiyanı müəyyənləşdirməyin ən etibarlı barometrlərindən biri sayıla bilər.

Hakimiyyətə yüklənib məhbusları bağışlamağa səsləyən siyasətçilərdən soruşa bilərsizmi onların “qara siyahısı”nda nə qədər “dustaq” var? Yəqin, heç bir ictimai kampaniya və təzyiq üsulu onları bütün arxivlərini açmağa vadar edə bilməyəcək. Elə bilin, Yejovun idarəsində yatanların sayını dəqiqləşdirməyə çalışırsız. Zəif ümidlə də olsa, partiya başçılarının “şəxsi qazamat”larında nə qədər adamın olduğunu müəyyənləşdirmək gərəkdir və onların əfv hazırlığını sınağa çəkmək vətəndaş həmrəyliyi kampaniyasının tərkib hissədir. Əlbəttə, verilən cavablar kimin nə qədər “demokrat” olduğunu üzə çıxaracaq. Hərəsinin bir damla dözüm limiti var, amma Avraam Linkoln kimi milyonlarla qulu köləlikdən azad etmiş kimi davranırlar… Ərdoğan demiş, ey virtual camiədə kazarma qurmuş siyasətçilər, blokladığınız adamları bağışlamağa hazırsınızmı?! Amma yeri gəlmişkən, bloklaşmaq, koalisiya qurmaq və ya bir blokda yaşamaq kimi müqəddəs bir söz görün, necə məna təhrifinə məruz qalıb.

Markın divarından həbsxana tikilməsinə imkan verməyin!”


VOİCEPRESS.AZ


Ранее » Zaxarova: "Rusiya Dağlıq Qarabağ münaqişəsinin həllində aktiv...« Далее Azərbaycan Münhen Konfransında enerji təhlükəsizliyi üzrə müz...